Madaxweyne Axmed Madoobe Oo Kulan Gaar Ah La Yeeshay Guddiyada Doorashooyinka

18

Madaxweynaha dowlad Goboleedka Jubbaland Axmed Maxamed Islaam Axmed Madoobe ayaa xalay kulan la qaatay qaar kamid ah xubnaha Guddiga doorashooyinka heer dowlad Goboleed ee Jubbaland iyo heer Federaal iyo Guddiga xalinta khilaafadka.

Madaxweynaha ayaa xubnahan Guddiyada uga mahad celiyay sida hufan ee ay usoo dhamaystireen doorashooyinka xubnahii u danbeeyay ee Aqalka  sare ee Baarlamaanka ee Jubbaland oo khamiistii lasoo dhaafay la dhameystiray kuraastii harsaneyd.

Madaxweyne Axmed Madoobe ayaa hoosta ka xariiqay in hada wixii ka danbeeya la guda gali doono doorashooyinka Xildhibaanada Golaha Shacabka ee Baarlamaanka Soomaaliya, isla markaana ay bilaabayaan diyaar garoowga qabsoomida doorashada.

Madaxweyne Axmed Maxamed Islaam Axmed Madoobe ayaa xubnahan ku booriyay inay sii laba jibaaran shaqooyinka horyaala taas oo qeyb ka ah dadaalada dalka loogu jihayno Doorashooyinka oo hada muhiim u ah dalka.

Khamiistii lasoo dhaafay ayey aheyd Magaalada Kismaayo ee Xarunta Gobolka Jubbada Hoose ay ka dhacday doorashada lagu dhameystirayay kuraasta Aqalka Sare ee Jubbaland ku harsaneyd, kuwaasi oo gaarayay afar kursi, sidaasina lagu wada doortay 8-da Senator ee Jubbaland ku metalaya Aqalka Sare.