Tuesday, December 7, 2021
Bogga Hore Wararka Manta Maxkamadda Maxkamadda oo shaacisay Magacyada dadkii dilay Sheekh Cali Dheere

Maxkamadda Maxkamadda oo shaacisay Magacyada dadkii dilay Sheekh Cali Dheere

36

Maxkamadda Ciidamada Qalabka Sida ayaa Maanta ka hadashay baarista lagu sameeyay kiiska dilkii deegaan hoostega Magaalada Gaallkacyo loogu geystay Sheekh Cali Axmed Faarax Dhoore (Sheekh Cali Dheere) oo ahaa Maamulihii Guud ee Jamciyadda Imaamu Nawawi ee Gobolka Mudug.

Xeer Ilaaliye ku-xigeenka Maxkamadda Ciidamada Muumin Xuseen Cabdullaahi oo warbaahinta la hadlay ayaa waxaa uu sheegay in dilka loo geystay Sheekh Cali Dheere, kadib ay tageen goobta uu falku ka dhacay Guddi ka socday Maxkamadda, isla markaana ay xog-wareysteen dad marqaatiyaal ah.

Xeer Ilaaliye Muumin ayaa shaaciyay in dilka Sheekha oo dhacay 17-kii May 2021 uu ka dambeeyay Askari ka tirsan Ciidanka Booliska Gaalkacyo oo lagu magacaabo Cabdixakiin Cabdisalaan Aadan, isla markaana ay gacan ku siiyeen laba Eedeysane oo lagu kala magacaabo Saciid Cabdi Xidig iyo Ina baalbaal, kuwaasi oo baxsaday.

Maxkamadda Ciidamada ayaa maamulada Puntland iyo Galmudug ka dalbatay inay si deg deg ah gacanta ugu soo dhigaan Eedeysanayaasha dilay Sheekh Cali Dheere, ayna Maxkamadda horkeenaan, si sharciga loo marsiiyo.

Sidoo kale Xeer Ilaaliye Muumin Xuseen Cabdullaahi ayaa Carabka ku dhuftay in haddii raggaas lagu soo qaban waayo muddo laba Bil guhadood ay Maxkamadda Ciidamada, iyaga oo maqan xukun ku ridi doonto.

Ugu dambeyn Xeer Ilaaliye ku-xigeenka Maxkamadda Ciidamada Qalabka Sida ayaa caddeeyay in Saraakiisha Ciidanka Mudug dhinaca Galmudug iyo kuwa Xafiiska la dagaalanka Al-shabaab ay sameeyeen xil gudasha la’aan ku aadan dilkii loo geystay Sheekh Cali Axmed Faarax Dhoore (Sheekh Cali Dheere).