Nin Miino Ku Aasayay Xaafad Ka Tirsan Muqdisho Oo La Toogtay.

34

Ciidanka amniga Booliska dowladda Federaalka ee degmada Warta-nabadda ee Gobolka Banaadir ayaa saqdii dhexe ee xalay ee xaafad ka tirsan degmadaas ku toogtay Nin doonayay inuu miino ku aaso wadada.

Ninka oo watay miino nooca dhulka lagu aaso ah ayaa waxaa la sheegay inuu doonayay inuu ku aaso waaxda horseed laanteeda Nationka ee degmada Warta-nabadda ee Gobolka, hayeeshee Ciidanka ay arkeen, isla markaana durbo toogasho ku dilay.

Guddoomiyaha Warta-nabadda Seynab Xaabsey oo la hadashay warbaahinta dowladda ayaa u sheegay in Ciidanka amniga degmada ay ka hortegeen Ninaas doonayay inuu miino ku waxyeeleeyo shacabka Soomaaliyeed.

Laamaha amniga ee guuleystay ka hortega falkaas ayey Guddoomiye Seynab Xaabsey u mahadcelisay, waxaana shacabka degmada Warta-nabadda ugu baaqday inay la shaqeeyaan laamaha amniga, si looga hortego wax kasta oo keeni kara amni darro.

Habeeno kahor ayay aheyd markii degmada Xamarweyne ee Gobolka Banaadir lagu qabtay Nin weerar loo adeegsaday Bam Gacmeed ku weeraray saldhig degmadaas, isagoo isku dayay inuu baxsado, hayeeshee gacanta lagu dhigay.