Monday, July 26, 2021
Bogga Hore Wararka Manta Shirka Madaxda Dowladda iyo maamul Goboleedyada oo maalintii 2-aad galay

Shirka Madaxda Dowladda iyo maamul Goboleedyada oo maalintii 2-aad galay

20

Shirka u dhexeeya Madaxda dowladda Federaalka Soomaaliya iyo kuwa maamul Goboleedyada dalka ka jira oo shalay ka furmay Teendhada Afiysooni ee Magaalada Muqdisho ayaa Maanta galaya maalintii labaad.

Shirkaan oo uu guddoominayo Ra’iisul Wasaaraha Xukuumadda xilgaarsiinta Maxamed Xuseen Rooble ayaa waxaa looga hadlayaa dardargelinta howlaha doorashooyinka iyo waxyaabihii ka hirgalay heshiiskii 27-kii May ee hannaanka doorashada dalka.

Madaxda ayaa shalay inta uu socday Shirka isaga xog-wareystay waxyaabaha u qabsoomay, horumarada la sameeyey iyo haddii ay jireen caqabado mudadii bisha ahayd ee ay kala maqnaayeen, kadib heshiiskii la gaaray.

Sidoo kale Ra’iisul Wasaare Rooble, Guddoomiyaha Gobolka Banaadir iyo Madaxda maamul Goboleedyada ayaa Maanta sii amba qaadi doona qodobada kale ee muhiimka u ah dardar-gelinta heshiiskii laga gaaray qabsoomida doorashada dhaceysa.

Warar la helayo ayaa sheegaya in Shirka ay ka qeyb geli doonaan Guddiyada doorashooyinka ee la magacaabay, kuwaasi oo tababar ku saabsan howlaha doorashada uga socda Magaalada Muqdisho ee Caasimadda dalka.

Shirka ka furmay Teendhada Afiysooni ayaa waxaa ka qeyb galaya Ra’iisul Wasaare Rooble, Guddoomiye Cumar Finish, Madaxda maamulada Jubbaland, Puntland, Galmudug, Koonfur Galbeed iyo Hirshabeelle oo qadka ZOOM-ka uga qeyb galaya.